هل مهر الفتاة دليل على قيمتها

معتصم الصادق كتب: تحية طيبة -- العمدة -- الزعيم -- والغائبة عبير --
النظريات والمثاليات ماتنفع والمشكلة يجب ان تحل مباشرة وبحلول واضحة وصريحة لان الكيل طفح -----
انا مع بحث حلول جديدة لاكبر مشكلة موجودة حاليا فى السودان
الحلول يجب ان تكون من جانب المراة بشكل كبير
المشكلة ليست فى المهور ولكن فى رغبة الشباب الفعلية فى تحمل المسؤلية (وممكن معاهم حق )--------
ياجماعة ناقشوا المشكلة بوضوح وشوفوا البورة وصلت وين ---
وداعا زمن الاحلام الجميلة ---- والحب العذرى ------

HALA FUAD كتب:تحيه حاره لكل الذين تناولوا هذا الموضوع السلس
اكيد الاهل ما برضو بورة بناتم وكل اب وام عايزين يشيلوا أحفادم بس من وجهة نظري في قريتنا كضرب مثال المغتربين هم البغلو المهر لأنو الواحد بمشي بشتغل سنه او إتنين على الأكثر وبجي محمل الشنط والدهب ووووو وعايز يتزوج بت ناس فلان الشافها في شريط عرس عايز يتزوجها مظهراً وما بفكر في جوهرها ويجي يغلي الاسعار للمساكين الهنا
وبالجد البنات مفروض يفكروا في السترة والقروش بتجي لو إختري الرجل البقدر يتحمل المسؤوليه ويقدرك والحياه ساهله لو بسطناها

HALA FUAD كتب:

شكراً على الرد والتعقيب الرائع

بس بختلف معاك في مسألة التقدير لأنو اي راجل إختار بت وإقتنع بيها بكل حاجاتها بكون عايز يقدرها لو كان مغترب وله قاعد في بلدنا بس إنتو يا مغتربين حاولوا تخففو الروايه شويه ومن وجهة نظري تخُتو حاجه ثابته لمراسم الزواج لكل فرد المستطيع والآخر عشان نحد من البوره شويه والعايز يقدر يقدر بطريقتو في بيتو لأنو الطريق قدامو طويل وربنا يسهل للناس كلهم

معتصم الصادق كتب: طبعا المشكلة اكبر من كده بكتير وانتو بتغردوا خارج السرب طبعا مع كامل الاحترام لكل الاراء الموقرة ---------
المشكلة تشمل كل المجتمع حتى بنات الاغنياء بايرات -------
المهر وماشابها بقت ما هى المشكلة الرئيسية فى الموضوع -----
شوفو حل لكمية الموظفات والالائى يمكنهن فتح بيوت --بس وين الراجل ---- وين ضل ( الحيطة )

يا معتصم فعل البورة حاصلة ودا شي طبيعي لان كمية البنات اكتر من الاولاد ودي من خلال دراسات كتيرة عن النسبة والتناسب بين عدد الاولاد والبنات في زمنا دا. وضل الحيطة موجود لو بس منو البقنعوا بالزواج إذا كان هو نفسو متخوف من الزواج او عدم مسؤولية فكتير من الاولاد ما بتحس عندو همة داخلية او مسؤولية تجاه ابسط مسوؤلياتو كمساعدة اهلو او جيرانو . راجل زي دا اودوهو وين ؟؟

كمية الجالسات فى البيوت وفقط منتظرات شباب وجيل محمود ع العزيز المستغنى عن الزواج والمشغول بكأس افريقيا ----
المغتربين اصبحوا شريحة ضعيفة ماليا واغلبهم خارج الشبكة ---
هل حواء مازالت تنتظر عباس ركس صاحب الكامرى --- ام انها مستعدة للتنازل عن كل الحقوق او جلها والمساهمة المادية الحقيقية فى عش الزوجية هذا هو السؤال ---
ياسادتى كل من وصلت 30 سنة دخلت فى بند اسمه البورة ---
اجيبوا على السؤال المباشر ماهو الحل وهل راجل المرة من ضمن الحلول والسؤال ليك --- ابوالعباس وودحمامه ----

هوووي يا معتصم انتي داير تقوم حرب البسوس ولا شنو انا وابو العباس حنطلع في الحيطة ونعاين من بعيد .. ههههههههه
اكيد راجل المرة جزء كبير من الحل انو لاسلام لما قال اربعة اكيد لحكمة يعلمها الخالق
--- الله يصلح الحال وقلبى ولهفى على كل غيداء تتنظر حلم طال
وازمة هى ليست من اسبابها -----
السعوديات سماحة وكاش مع كل ذلك بورة بالكوم ---حاجة تحير --

معتصم الصادق كتب:تحية نهارية بلون الطماطم -----
ياعمدة الكلام موجه بحكم الخبرة فى الحياة لا اكثر ----
والمنتدى كلو عزابه وبالتالى نحتاج الراي الاخر -----
تخريمة ---
انت خواف كدا مالك-- اتكلم ساي ي مافى زول جايب ليك خبر -
وعمك ابو العباس مابقدر بفتح خشمو ( لكن بوصف )

عبير عوض كتب:انا مع كلام محمد حمامه
*****************
لكن الشباب القاعدين قدام البقالات شرب السجائر والتعليق الكتير لو خلو
وعزم داخل نفسو علي الزاوج والله بعرس
أحيانا الزول بشوف شباب النصيحه بطنو بتقرف عدم الؤاخذه
يعني المشكلة ما واقفة علي البنت ومهرها الغالي ايضا علي الشباب

معتصم الصادق كتب:والله المسئؤلية حارة فى هذا الزمن
الهملة والانطلاقة عنوان شباب اليوم
التخوف من حرب بين الاسرة والنسابة سبب مهم بخلى الشباب إطفش
الدولةوالمجتمع ما ليهم اي دور
ما زرعنا كيف عايزيين نحصد
قلة الفرص المتاحة بضيق خلق الشباب
كلهم بقولو هى ماناقصة

حرب النسابة يا غالي بيد الشاب لو مسك العصاية من نصها وما ظلم طرف على حساب الطرف الاخر وذا كانت الحقوق متساوية ما حتكون في حرب يعني دا حق ناس امي ودا حق مرتي مفترض الكيمان ما اتلخبطن . لك ن في ناس بلخبطو الكيمان وما بعرفو تاني احلوها

قلة الولاء فى العلاقات بين الجنسين (اي بنت ممكن تبيعك لاى سبب حتى الاغانى الجديدة بتحمل هذه المعانى غير الفاضلة ( عايزة تبقى خوة)(كل البنات سوا )(والجابو لي اخبارو_)
الاغانى الشبابية تعبر فى الغالب عن راي الشارع
اضرب الهم بالفرح شعار ربما كان جيدا
--- الله اصلح الحال ويفك البورة ------

HALA FUAD كتب:

التحية محمد بس لو وقفت في السكه حديد ومسكتها من بداية المسيخاب لحدي النواته بتلقى كلامي صاح بالنسبه للمغتربين وبالعكس انا ما شاده عليكم بس عملت تحليل وطلعته بالإحصائيه دي

وفي النهايه كلنا عايزين الستره وبالجد يا رجال ما تتخوفو وخشو بقلب قوي ولو على النسابه يا معتصم اصلاً ده الحال من قامت الدنيا وعلاقتنا مع بعض جوه بيت الحلال لازم نبعد منها مفهوم النسابه لانها بالجد بتخرب الدنيا

يمكن الرجال بقو بحبزو الفئات العمريه ما دون العشرين لانهم بكونو فريش يعني ممكن يعجنها ويشكلها على كيفو ده الفهم البقى سايد عندهم

والأغاني الهابطه الفي الشارع اكيد ما بتأثر على الراجل السوي المسؤول

عبير عوض كتب:ليه المسؤلية حارة الزمن ده لو كل زول عرف اليهو والعليهو ما بتكون حارة
وحكاية الحرب بين الاسره والنسابة ده شنو وكيف يعني بتخلي الشاب يطفش
البعرفو البنت دايره الولد والولد داير البنت تاني في شنو
والحرب ده بتتحل بالتفاهم بس يعني ما تكون شماعه (النسابه)

عبير الخضري كتب:

نفترض

*تنتحر

*تصاب بحاله نفسيه

*تكره حاجه اسمها بنت

*وحالات اخرى

[/color][/right]

عبير الخضري كتب:

بسم الله الرحمن الرحيم

احتمال ردي يكون مختلف شويه عشان انا بنت

الزمن ده يا ابو بكر كل شئ في الزواج معتمد على قرار البنت

وانا بحس الابوين ما عندهم دخل في مسألة الزواج

وبنات الزمن ده بحبذوا بالبلدي كده الشاب التقيل

يعني كلام تزوجوا فقراء يغنيكم الله انتهي الزمن ده

عشان كده الايام ده المهر لازم يكون خيالي

****************

والله انا شخصيا شوفت مهر لواحد نسيبنا يقدر ب150 مليون هذا هو المهر طيب باقي المستلزمات التانيه تكون كيف؟

مديحه عبدالله كتب:

المهر حق شرعي للفتاه
قرره الشرع لها وهو اكرام لها وحفظ لحقوقها
ولكنه ليس بدليل لقيمة المراءه على الاطلاق
فقيمة المراءه في تقدير الزوج واهل الزوج لها ومعرفة كيف الزوج ان يحافظ عليها ويقدرها ويعطيها ما تستحق من قيمه في حياتهم سويا
والكل له مقدرته في المهر ...اماتنا زمان في الاتزوجت ب75قرش لاغير وعشن سعيدات مبسوطات مقيمات بلا اهانه او ذله من قبل الرجل ويقلنها بكل فخر (اانا دفعو فيني 50 قرش )ولا عيب في هذا ...ولكن الان تغيرت النظره للزواج ككل اصبح من لايدفع فيها الملاين مضحكه ومهزله بين الناس (بالله جاب ليها شو دافع 2مليون وشيله اخير عدمها مابتفتح كشك )ياخي دي نظرة شنو دي ؟؟والخرطوم حدث ولااااااحرج ومابنقدر تناقش فيهم ابداااا
الكل حسب مقدرته فيما يدفع ومن توفرت عنده لامانع لنا فيما يدفع وليس هذا ليس تقييم ..التقييم ان تقوم بما عليك فعله في الزواج كما جرت عليه العاده ليس الا ..
غلاء المهور هذا نسمعه هنا في المملكه وغيرها من الدول العربيه يحددون المهر لو مادفعت 60 الف او 150 الف ما بنعطيك بنتنا بت هي ولا كامري
سبحان الله قبل كم يوم كنا في زياره لاحد الجيران (سعوديين)وكنا نتحدث عن الزواج ومتطلباته في السودان كانو يسالونا تحديدا عن المهر(كم مالهر عندكم)قلنا مابنحدد المهر نحنا الرجال الكويس على طول نزوجو البنت (انذهلت البت قالت لامه يالله يامي وانا اقول ايش فيهم السودانين يتزوجون ومافي بت تجلس والله لو عندنا هنا لو مادفعت اقل شي 100 الف مابتتزوج(ضحكت قالت لي خلاص زوجوني سوداني ههههه عرض مغري هل من طالب


قيمة المراءه في اخلاقها وشرفها ومكانتها في قلب زوجها