حمار النوم واشياء اخرى

حمار النوم واشياء اخرى
________________________________________
ما ح اسرف عليكم فى فقه التحايا عشان عارفكم مستعجلين وما فاضين لى طبعا الايام دى الشعب السودانى كلو ما فاضى ومشغول وحايم ما بين الجزيره والعربيه وزحمه بتاعت بكيات لسه ما رفعنا فراش (بن على) ظهر لينا فراش (حسنى مبارك) قبل (حسنى مبارك) ما يتم التالتى اليمن رقدت المستشفى وهسى اولاده بفتشو فى الحنوط من بدرى وفى واحد صاحبنا كده طالع ليهو فى دندهوب ويعاين للعسكار ده والغبار وشغال حولينا ماها علينا ومحمد معانا ما تغشانا عشان ما ادخل المدير فى حته ضيقه والزول ده زول مسكين ح اطلع من الموضوع ده المهم امس جانى حمار النوم وبينى وبينكم من صغير بجينى حمار النوم ده ويودينى محلات غريبه وعجيبه يعنى فجاءه بلقا نفسى جمب بيت ناس (ريم عبدالله على) هسى واحد يجيك ناطى يقول ليك ريم دى منو انت مالك عليها!! هسى خليت الموضوع ده كلو ومسكت فى ريم دى منو؟ غايتو انت زول غريب خااااالس خالس .. المهم مرات كده بلقا ليك نفسى فى بيت ناس خليفه (فى الحاله دى مافى زول بسال يقول خليفه منو) ومرات القا نفسى فى القسم ومره لقيت نفسى فى مبانى الحركه الشعبيه وبناقش لى فى زول عن الابوستملجى المهم امس من الغرايب ساقنى حمار الجن ده ودانى محل غريب خلاس فجاءه كده لقيت ليك نفسى جمب المجسم بتاع الجندى المجهول فى شارع الوادى نعلت الشيطان ولفيت الحمار وقلت ارجع زولكم طلع زهجان وشكلو الوقفه طولت عليهو مسك فينى وقعد يحلف ومرات طلاق ومرات بحياة ولادو طبعا الناس ح تقول على مزهلل هو مجسم الجندى المجهول عندو ولاد بقول ليكم ايوا جنكم تغالتو تقول صالحكو قريبكم
ايوا عندو ولد وبت البت اسمه (ناديه) والولد اسمو (محمود) يعنى لو رجعتو لى محمود بتلقو (محمود الجندى المجهول) وناديه نفس الحكايه (ناديه الجندى المجهول) اتولدو هنا فى شارع الوادى دا لكن ظروف العمل ودتم مصر وبقو نجوم
المهم بعد حلايف كده وطلاقات قعدنا اتكلمنا فى قضايا عديد (شفته قضايا عديده دى كيف ) حسيت بيهو موجوع لانو الشاهد الشاف كل حاجه ولقيتو مغرر يرحل او يسقط ويتهشم فهو وصل مرحلة الياس ...
قلت ليهو قبل ما تمشى وتودع ....
لو عايزك القاك وين ؟؟؟؟
قال وهو يتمتم لو سألت عن الجسد
كوتة بيوت .. محروسة بي روح من قزاز
والخدش فيها كما الكسرْ
..

قلت :ولو سالت عن الرسوم المتحركة التي اتاتني..فل"لوطنى" ما اعطى ول"لشعبى " ماترك
قال: وهو يمسك بعصاه اصلها فى الشمال وفرعها فى الجنوب: قل إنما الناس هردبيس
قلة مناولة وإكتمال
والشارع المعلن .. عبط
قلت وانا ممسك بجريده نخله اصلها فى مروى ومنتهاها هنا فقط
جزاءاً وفاقا .. جزاءاً وفاقا
سكتنا على إنجاب العنكبوت .. فكان الفصل وماهو بالهزل
قال وهو شاحب:
..عذرائيل ايضا" يعمل بفن" السكوت علامة الرضا" فللملائكة امثالها
قلت وانا مبهم التفكير
كثرنا يموت( فاغر ) الحياة .. للموت طريقته في انتخاب الجماجم ..!ا
إذ ليتهم يعلمون .. لو أنهم _ فقط _ يتمهلون في شفط الذل المؤكسج .. لنعموا بوطن كامل الدسم ..!ا
قال كلنا يموت بسكتة في القلب..ليست محض فسيولوجيا..ابدا
قلت وقد بداء يبتعد عنى شيئا فشيئا
ونحن ( ندوعل ) في الجرح .. والغصّه .. للحد الـ ( تتضخم ) فيهو _ فينا _ تضاريس نون النسوة ..!ا
قال وقد بدا صوته بعيدا الذل مراتب:ان تتنفس.. ان تاكل .. ان تتجاسد "بلغة عفراء"..ان "تتطامن"..ان تتضامن..ان تنتخب.. ان تكون سودانيا" وهو ماليس بينه والعار سوى "صفيه" اما العار فهو اقاصي..
لقد قالها لنا و قالها للبلاد بكاف الكوارث ونون النحيب يالها من(كن) يا رب..يالها من (كن)ا!